சாதிநூல்-5

5. 1880 - வேளாண் மரபியல்:

                ‘வேளாளர்களுக்கும் சென்னை மியூனிசிபல் கம்மிஷனர்களுக்கும் நடந்த இங்கிலீஷ்சரித மொழிபெயர்ப்பும் அதன் உபந்தியாசமும்’ - இதனை இங்கிலீஷ்பயிற்சி யில்லாதவர்களுக்கும் உபயோகமாகும்படி தமிழில் மொழிபெயர்த்துத் தரவேண்டுமென்று - பாண்டூர்மிட்டா ஜமீன்தார் மகா மகா ஸ்ரீ குன்றத்தூர் - சோமசுந்திரமுதலியாரவர்கள், விச்சூர்மிட்டா ஜமீன்தார் மகா மகா ஸ்ரீ திருவூர் தெய்வராயகமுதலியாரவர்கள் - இவர்கள் கேட்டுக்கொண்டபடி, சென்னைத் துரைத்தன சங்கத்தமிழ்ப்புலமை சமரசவேத சன்மார்க்க சங்கம் மகா மகா ஸ்ரீ தொழுவூர். வேலாயுதமுதலியார் அவர்களா லியற்றப்பட்டு - மகா மகா ஸ்ரீ கூடலூர் சுப்பையாப்பிள்ளை அவர்களால் அச்சிற்பதிப்பிக்கப்பட்டது. PRINTED AT  THE SCOTTISH PREES BY GRAVES, COOKSON & CO 1880 - விலை 8 அணா - தபால் செலவு ஒரு அணா என்றும் விளம்பரமும் உள்ளது - 1871இல் எடுக்கப்பட்ட குடித்தொகை மதிப்பில் வேளாளர்களை சூத்திரர் என்று குறித்தது தகுதி குறைவானதும் நியாயவிரோதம் என்று கூறி காசி - விஸ்வனாதமுதலியார் குடிமதிப்புச் சபையாருக்கு எழுதிய கடிதமும் வேளாளர் வைசியர் எனக்குறித்து எழுதப்பட்ட பின்னிணைப்பு விவரங்களும் இதில் இணைக்கப்பட்டுள்ளன. அதேபோல் குடிமதிப்புச்சபை கமிஷ்னர் மிஸ்டர் கோவர்துரை வேளாளர்களை வைசியர்களாக ஏற்றுக்கொள்ள ஆட்சேபம் இல்லை என்று வேளாளர்க்கெழுதிய கடிதமும் உடன் சேர்க்கப்பட்டுள்ளது. இந்நூலில் வேளாளர் வைசியர் எனக்காட்ட பூவைசியர், தன வைசியர், கோவைசியர் என்ற புதிய நிகண்டில் இல்லாத செய்திகள் சொல்லப்பட்டுள்ளன பின்வரும் நூல்களில் இவை கண்டிக்கப்பட்டுள்ளன. பூ - என்றால் பூமி - எனவே பூமியை உழுது வாழ்பவர்கள் வேளாளர் என்று இதன் பொருத்தப்பாட்டை விளக்குகிறது. சூத்திரர் சாஸ்திரப்பிரகாரம் வேதம் ஓதக்கூடாது என்பதனை எடுத்துக்காட்டி தாங்கள் வேதம் ஒதுவதால் வைசியர் ஆவோம் என்கிறது. நால்வருணங்களை விளக்கி அவைகளின் தொழில்முறையை நிகண்டகராதிகளின் துணைகொண்டு விளக்குகிறது. வேளாளர்கள் காணியாட்சி சுதந்திரம் (மிராசி ரையிட்) பெற்றவர்கள் என்றும் தமிழ்ச்சாதிகள் பதினெட்டும் இவர்களின் அடிமைகள் என்றும் குறிப்பிடுவதைக் காணலாம். பறையர் பண்ணையாருக்கு (வேளாளர்) எழுதிக்கொடுத்த அடிமை சாசனம் அநுபந்தமாக கொடுக்கப்பட்டதினால் வேளாளர்கள் தங்களை ஆண்டைகளாகக் கட்டமைத்துக்கொண்டனர். ஜாதிகுலம் பொய்யென்ற நூல்களின் கருத்தை விளக்கி வருணாச்சிரமகங்களின் பயன்களைக் இறுதியாகக் குறிப்பிடுகிறது. சூத்திரர் வைசியாபிமானம்கொண்டு எழுதிய நூல் இதுவென பின்வந்த சாதிநூல்கள் கண்டிக்கின்றன.

சாதிநூல்-4

4. 1875 - சாதிநூல் (TREATISE ON cASTE):

                        திருவாரூரிலெழுந்தருளியிருந்த ஞானப்பிரகாசசுவாமிகள் ஆரியபாஷையிலுள்ள ஆகமபுராண இதிகாசநூல்களினாதாரங்களைக் கொண்டு இயற்றியது. இந்நூல் -தொண்டைமண்டலம் மயிலை சந்திரசேகர நாட்டாரவர்களாலும் திருவல்லிக்கேணி சண்முககிராமணியாரவர்களாலும் பரிசோதித்து - சென்னை கலாநிதி அச்சுக்கூடத்திற் பதிப்பிக்கப்பட்டது. சாலி - 1797-ககுச்சரியான பவவருஷம் 1875இல் ரிஜிஸ்டர் செய்யப்பட்டது-இந்நூல் ‘சான்றோர்’ எனப்பெயர் புனைந்து வாழ்ந்துகொண்டிருந்த சேர சோழ பாண்டியர் வம்ச வழியினர் தாம் என¢சில சாதியார் கூறுவதைக்கண்டிக்கும் விதமாகவும், சென்சஸ் சபையார்களின் அறிவை மயங்க வைத்த சில நூல்களையும் கண்டித்து சுப்ரபேதம் (ஆகமம்) வைகானசம்,வியாசர்நூல், சூதசங்கிதை போன்ற நூல்களின் ஆதரவைக்கொண்டு பல பிரதி ரூபங்களைக்கொண்டு பரிசோதித்து அச்சிட்டதாக அதன் பாயிரம் குறிப்பிடுகிறது.                           இதில் சாதிகளின் உற்பத்தி, அவைகளின் தொழில், சமூக அந்தஸ்து இவைகளைக்குறித்து செய்யுள் வடிவமாக எழுதப்பட்டுள்ளது. சாதிகளின் உற்பத்தியை விளக்கும்போது சுத்தசாதி உற்பத்தி என்றும் சங்கர (கலப்பு) சாதி உற்பத்தி என்றும் பிரித்து, அதில் சங்கரசாதி என்போர் பிராமண, க்ஷத்திரிய, வைசிய, சூத்திரசாதிகள் என்றும் இவர்களின் தப்பான கூடலால் பிறந்தவர்களே சங்கரசாதியினர் என்று குறிப்பிடுவதைப் பார்க்கலாம் - சங்கர சாதிகளின் விவரம் குறிப்பிடுகையில் அநுலோம, பிரதிலோம, அந்தராள உற்பத்தியினைக் கூறுகிறது. மேலும் இந்த சங்கர சாதிகள் களவில் தம்முற்கூடி விராத்தியர் என்ற புதியவகை கலப்புசாதியினை உண்டுபண்ணுவதாகவும் இன்னும் பலவும் விளக்கப்பட்டுள்ளன-இந்நூலின் அநுபந்தமாக 96 சாதிகளின் பெயர்களும் காரணங்களும் பட்டியலாகக் கொடுக்கப்பட்டுள்ளன. மேற்படி தவல்களின் ஊடாக அவரவர் சாதிக்குரிய தொழிலையும் தகுதியையும் உற்பத்தியையும் குடிமதிப்புச்சபையார் தெரிந்துகொண்டு அதன்படி அவர்கள் சாதியை அங்கிகரிக்கவேண்டும் எண்ணம் கொண்டதாக இந்நூல் அமைந்திருப்பதைக் காணமுடிகிறது. மரபாக வகுக்கப்பட்ட சாதிய மதிப்பீடுகள் பிரித்தானியர் ஆட்சியில் மாற்றம் பெறுவதை நம் அறிவுஜீவிகள் இதுபோன்ற நூல்கள் எழுதி தம்புலமையை நிலைநாட்டியுள்ளனர் என்பதை அறியமுடிகிறது. இதில் கள்விலைஞரான சாணார் (சான்றார்) உற்பத்தி வருடத்தில் ‘சான்றார்’ என்பதர்க்குபதில் ‘பழையர்’ என்று வந்துள்ளதையும் இந்நூலின் பிரதிகளை பரிசோதித்தவர்கள் மேற்படி சான்றார் குலத்தினர் என்பதாலும் இது ‘நாடார்’ சாதிக்கு ஆதரவாக எழுதப்பட்டுள்ளதை நோக்கமுடிகிறது - இச்சாதிநூலையே உலகநாகப்பண்டிதர் எழுதியதாக சாதிபேத விளக்கம் என்று பெயர்மாற்றி யாழ்ப்பாணம் சி. செல்லையாபிள்ளை,                            நா. சிவசுப்பிரமணிய சிவாச்சரியாகும் அச்சிட்ட நூலில் பழையர் என்றதற்குப் பதில் ‘சான்றார்’ என்று அச்சிட்டிருப்பதையும் காணமுடிகிறது - ஒரு சாதிகுறித்தான இருநூல்களில் வேறுவேறு விதமாகக் குறிப்பிடப்பட்டிருப்பதை நோக்கும்போது சாதிநூல்களின் சாதிய அரசியல் பட்டவர்த்தனமாக வெளிப்படுவதைப் பார்க்கிறோம். பின்னட்டையில் இந்நூல் குறித்த விளம்பரமும் உள்ளது.

சாதிநூல்-3

3. 1874 - சான்றோர்குல மரபுகாத்தல்:

                                இஃது கிறிஸ்தாப்தம் 1872ஆம் வருடம் அச்சிடப்பட்ட ஜாதிசங்கிரகசாரம் என்னும் நூலில் சான்றோர் குலத்தவர்களைச்சுட்டி எழுதப்பட்டிருக்கின்ற தப்புகளை நூல்வழக்காலும் உலகவழக்காலும் அகற்றுதற்கும்- உண்மையை ருசுப்படுத்துதற்கும் -ச. வின்பிரிட்டு ஐயர் அவர்களியற்றியது - சென்னபட்டணம் வேப்பேரி, சி.பாஸ்ட்டர் அன்டு கோ அச்சுக்கூடத்தில் பதிப்பிக்கப்பட்டது - சாலிவாகன சகாப்தம் 1797 – க்குச் சரியான கிறிஸ்தாப்தம் 1874ஆம் வருடம் விலை 2 ரூபாய்,8 அணா - சான்றார் கள்விலைஞர் அல்லர் என்றும் சாணார் என்ற பேச்சுமொழிச்சொல் ‘சான்றார்’ என்ற சொல்லிலிருந்து வந்ததாக உரைத்து கள்விலைஞர்களான பழையர், துவசர், படுவர் பெயர்களின் காரணங்களை குறிப்பிடுகிறது. கிராமணியர் என்ற பெயரை ஜாதிசங்கிரகசார நூலார் கிராம அந்நியர் எனப் பிரித்து கிராமத்திற்கு அந்நியமானவர் என்று உரைத்தமையைக் கண்டித்து கிராமத்திற்கதிபதி என்று கூறுகிறது-அதேபோல் மேற்படி நூலார் ‘நாடார்’ என்பதை கிராமத்தில் நாடாதவர் என்ற எதிர்மறைப்பொருள் கொண்ட செயலையும் கண்டித்து நாட்டை ஆண்டவர்கள் நாடார்கள் என்று நிலைநாட்டி நாடான் = நாடன் என்பவை தமிழ் சூத்திரிய மன்னர்களின் பட்டப்பெயர் என்பதனையும் நிறுவுகிறது - கால்டுவெல் சாணார் பற்றி கூறிய செய்திகளையும் மேற்கோள் காட்டி இந்நூல் செய்யப்பட்டுள்ளது‘சாணாரக்காசு’ என்ற காசைப்பற்றி இதில் சாணார் பெயர் இருப்பதால் ‘காசு’ அச்சிட்டு வெளியிடும் உரிமை மன்னர்க்கே உள்ளமையால் சாணார் எனப்படும் சான்றார் குலத்தவர்கள் (தற்போது நாடார்) க்ஷத்திரியர்கள் என இந்நூல் விளக்குவதை புரிந்துகொள்ளலாம்.

சாதிநூல்-2

2. 1872 - சித்தூர் ஜில்லா அதாத்துக்கோர்ட்டுத் தீர்ப்பு:

இந்நூல் விஸ்கர்மா வகுப்பைச் சார்ந்த பண்டிதர் மார்கசாய ஆசாரிக்கும் விப்பிராள் (பார்ப்பனர்) ஆன பஞ்சாங்கங்குண்டையருக்கும் பஞ்சாயத்தார் முன்னிலையில் விஸ்வப்பிராமணிகத்தைக்குறித்து நடந்த வாதமும் - பஞ்சாயத்தார் தீர்மானமும் - பண்டிதர் சோமசுந்தரப்பிள்ளை சம்பாஷணையும் - மேஜிஸ்திரேட்துரைகள் கொடுத்த டைரியும் - சித்தூர்ஜில்லா அதாலத்துகோர்ட்டு மகாகனம் பொருந்திய கவரன்மெண்டஜட்ஜி டேக்கர் துரையவர்கள் கொடுத்த தீர்ப்பும் - சென்னப்பட்டணம் விஸ்வபிரம்ம சபையார் கேட்டுக்கொண்டபடி- முனியப்பாச்சாரியாரால்-கலாரத்நாகர அச்சுக்கூடத்திற் பதிப்பிக்கப்பட்டன - சாலிவாகநசக வருடம் 1794இல் தமிழ் பிரஜோத்பத்தி வருடம் சித்திரை மாதம் (1872) ரிஜிஸ்டர்செய்யப்பட்டது. இப்பிரதிக்கிணங்க வேலூர் குமாரஸ்வாமி முதலியாரது வாணீவிலாச அச்சுக்கூடத்திற் 1892ஆம், சென்னை,  இட்டா பார்த்தசாரதி நாயுடு அவர்களது ஸ்ரீ பத்மநாப விலாச அச்சியந்திரசாலையிற் 1908-ம், திருமயிலை - பரமசிவ முதலியாரால் திருமயிலை மாணிக்கவேலு முதலியார் அவர்களால் தமது வித்வசிரோமணி விலாச அச்சியந்திரசாலையிற் 1930ஆம் (12 அணா), சென்னை மண்ணடி பூ.ரா அப்பாத்துரை முதலியார் அவர்களது, சரவவணபவ அச்சியந்திரசாலையில் 1934ஆம் பதிப்பிக்கப்பட்டன (விலை 12 அணா)- 1934ஆம் பிரதியே நாம் இங்கு ஆய்விற்கு எடுத்துக்கொண்டது - இதன் முகப்பிற்குப் பின்னட்டையில் சென்னைப் பட்டணம் விஸ்வப்பிரம்ம சபையின் கையொப்பக்கார்களாக தி.நா. மாசிலாமணி ஆசாரியார் முதல் தா. சுந்தராசாரி வரை 198 பேர்களின் பட்டியல் உள்ளது - விஸ்வகர்ம வகுப்பினருக்கு பண்டிதர் மார்க் கசாய ஆசாரி திருமணம் செய்து வைத்தது செல்லாது என்று கூறி பார்பனனான பஞ்சாங்க குண்டையன் பஞ்சாயத்தில் பிராது கொடுக்க இவ்இருவருக்குள் நடந்த சம்பாஷனையில் மார்கசகாயத்திற்கு தீர்ப்பானது - இதனால் விஸ்வகர்மா வகுப்பினர்க்கு இனி அவர்கள் வகுப்பில் சிறந்தோர் மணம் செய்து வைக்கலாம் என்று சித்துர்ஜில்லா அதாலத்துக்கோர்ட்டில் 1818இல் தீர்ப்பானது பார்ப்பன புரோகிதத்தை மறுத்து அவர்கள் சமூகத்தலைவர்களே மணம்செய்துவைப்பது இன்றும் நடைமுறையில் உள்ளது குறிப்பிடத்தக்கது- இந்த விவாதத்தில் மார்க சகாயம் விப்பிராள் (பார்ப்பனர்) பிறப்பு மற்றும் இந்து மதத்தில் உள்ள ஆபாசங்களை விளக்கியுள்ளார் - மேலும் திரிமூர்த்திகளின் கதையைக் கூறும் புராணங்கள் பொய்யென்கிறார் - இவர் உயிர்களைக் காப்பாற்றுவது சூத்திரனின் பெருமை என்றும் சூத்திரருக்கும் வேதோ அத்யயனம் செய்யும் உரிமை உண்டென்கிறார் - இவர் திருமால் நெறியைவிட சிவநெறிக்கு முக்கியம் கொடுத்துப் பேசியதை இந்நூலில் பல பக்கங்களில் காணலாம். வாதியான மார்க சகாயத்திற்கு கலியாண சாமக் கிரியை நஷ்டம் ரூபாய் 550 தரவேண்டும் என்று பிரதிவாதிகளுக்கு கோர்ட்டார் உத்தரவிட்டனர் - விஸ்வகர்மா ஜ் பார்ப்பனர் இவர்களுக்கிடையில் நடந்த தீர்ப்பு, சம்பாஷனை,  

விவாதம் முதலியவைகளை பிறரும்அறியும் வண்ணம்                                                இத்தீர்ப்பு மேற்படி தலைப்பில் அச்சிடப்பட்டது. அதன்இறுதியில்
‘’இத்தீர்ப்பு முதலானதை மித்துரு - சத்துரு - அயலாரென்று எண்ணாமல் ஆதியோடந்தமாய்பப் பார்வையிட்டால் துன்மாக்க மற்றுச் சன்மார்க்கத்துக் களாளவதற்கு யாதொரு சந்தேகமில்லை’’ (1934:முன்னுரை) என்று குறிப்பிடப்பட்டுள்ளது.

சாதிநூல்-1 [சாதிநூல் ஆய்வடங்கல்]

                                இது ’தமிழ் அச்சுப்பண்பாடு சாதிநூல்கள்’ (1800-1950) என்ற இவ்வாய்வேட்டிற்கு மூலநூல்களாக எடுத்துக்கொள்ளப்பட்ட தேர்ந்தெடுத்த அய்ம்பது சாதிநூல்களின் மிகச்சுருக்கமான ஆய்வடங்கலாகும். இதில் ஆண்டுவாரியாக நூல்கள் வரிசையிடப்பட்டுள்ளன. இதில் குறிக்கப்பட்ட எண்கள் மேற்கோளின் அடைப்புக்குறிக்குள் இடப்பட்ட எண்களுடன் (1,2,3.......) ஒத்துள்ளன.ஒருவகையில் மூலநூல்களின் துணைநூற்பட்டியலாகவும் இவற்றைக் கொள்ளமுடியும். இதன் முடிவில் சாதிநூல்களின் முகப்புப் பகுதிகள் இணைக்கப்பட்டுள்ளன.இது சாதிநூல்களின் புரிதலை இன்னும் விரிவுபடுத்துமென நம்புகிறேன்.

1. 1872 - ஜாதி சங்கிரகசாரம்:

                                இந்நூல் மயிலைக்கடுத்த குண்ணம் முனிசாமிப்பிள்ளையால் இயற்றப்பட்டது. ம. சிவபாதநாயகர், நயப்பாக்கம் வீராசாமிநாயகர், லா. செங்கல்வராய நாயகர், க. ஆண்டியப்பராயகர், அத்திப்பாக்கம் வெங்கடாசலநாயகர் முதலிய வன்னிய தனவான்கள் கேட்டுக்கொண்டபடி எழுதப்பட்டதாக நூல்முகப்பில் உள்ளது - மேலும் இந்நூல் காஞ்சிபுரம் முத்துகச்சீஸ்வரகுருக்கள், கு.சின்னசாமி சாஸ்திரி, நாகை                      - வைத்தயநாத சாஸ்திரி, நெல்லூர் நாராயாணையர்,ம. செங்கல்வராயப் பிள்ளை, போ.சுதரிசனதாஸர் இவர்களன்றி இன்னும் பலர் முன்னிலையில் அரங்கேற்றப்பட்டு கவிரஞ்சனி அச்சுக்கூடத்திற் பதிப்பிக்கப்பட்டு தமிழ் ஆங்கீரச வருடம் ஆனிமாதம் 1872ஆம் வருடம் சூன் மாதம் வெளியிட்டப் பட்டது - 1871இல் எடுக்கப்பட்ட குடித்தொகை மதிப்பில் பலசாதிகளின் விவரங்கள் தவறாகக் குறிப்பிடப்பட்டுள்ளதைச் சுட்டிக்காட்டி மேற்படி குடிமதிப்பைச் செய்த மிஸ்டர் கோவர் துரை அவர்களுக்கு முறையான வழக்கமான சாதிவரிசையைக் காட்ட இந்நூல் எழுதப்பட்டுள்ளது. அக்குடிமதிப்பு நூலைச்செய்யும் போது

’’இந்தத்தமிழ் நாட்டுக்குரிய புராணநூல்களைக் கொண்டும், பூர்வீக வழக்க வொழுக்கத்தை விசாரித்தும், பொறாமை கக்ஷிபேதமில்லாமல் நடு நிலைமையையுடைய வித்வான்களைக் கொண்டும், மேற்படி நூலைச் செய்யாமல் வாசித்தல் – தேசத்துப் பூர்வீகவழக்க வொழுக்கமொன்றுந் தெரியாத வடக்கத்திய வடுகர் வாய்மொழியைக்கொண்டு’’ (1872:2)

1872

செய்யப்பட்டதால் இதில் பல குறைபாடுகள் இருப்பதாக குறிப்பிடுகிறது.இத்தோடு ‘பள்ளி’ என்கிற சாதியாரை (வன்னியர்) சூத்திர வருணத்தில்உள்ள ஒன்பதாவது  பிரிவில் சேர்த்திருப்பதைக் கண்டடித்து அவர்கள்அரசபரம்பரையினர் என்றும் ‘பள்ளி’ என்பது அரசருக்குரிய பட்டம் எனவும்விவரிக்கப்பட்டுள்ளது. இந்நூலை எழுதத் தூண்டியவர்கள் வன்னிய தனவான்கள் என்பதிலிருந்து. இது வன்னியரை க்ஷத்திரிய வருணத்தாராக அங்கரிக்க எழுதப்பட்டது என மறைமுகமாகத் தெரிந்துகொள்ளலாம் - இதில்பல ஜாதிகளின் உற்பத்தி விவரம் சொல்லப்பட்டுள்ளது - சமஸ்கிருத அமர நிகண்டில் சொல்லப்பட்ட சாதிகளின் பட்டியலும் - தமிழ் திவாகர, சூடாமணிநிகண்டுகளில் சொல்லப்பட்ட சாதிகளின் உற்பத்தி விவரமும் பட்டியலாகத்தரப்பட்டுள்ளன. இன்னும் பல சாதிகள் தம்முள் கூடி ஏற்படுத்திய சங்கர (கலப்பு சாதி) சாதிகளின் விவரமும் கொடுக்கப்பட்டுள்ளன. இறுதியாககுடிமதிப்புச் சபையார் செய்த தீர்ப்பு அனியாயபுரிப் பட்டியணத்தில் வழங்கிய தீர்ப்பைப் போலவே இருவருக்கும் பயன்படாமல் இருப்பதைச் சுட்டிக்காட்டுகிறது. மக்கள் தொகைக் கணக்கெடுக்கும்போது அவர்கள் செய்ததப்பிதங்களை தனித் தலைப்பிட்டு விரிவாக விளக்கியிருக்கிறது. சாதிநூல்கள் தோன்றுவதற்கு குடிமதிப்புத் தொகை எடுக்கப்பட்டபோது பல சாதிகளின் விவரங்கள் இந்நாட்டு புராண இதிகாசங்களுக்கு மாறாகக் குறிப்பிடப்பட்டதே காரணமாகும். என்பதற்கு இந்நூலே சான்றாகும்.

யுவபாரதி: அகராதி & நிகண்டு

யுவபாரதி: அகராதி & நிகண்டு: தமிழ் - வடமலை நிகண்டு <input type="text" name="item-7-0-title" value="த&am...

யுவபாரதி: இலக்கியம் & இலக்கணம்

யுவபாரதி: இலக்கியம் & இலக்கணம்: தொல்காப்பியம் எட்டுத்தொகை நூல்கள் நற்றிணை , குறுந்தொகை , ஐங்குறுநூறு, கலித்தொகை , அகநானூறு, பதிற்றுப்பத்து , புறநானூறு , பரிபா...